بدھ، 26 ستمبر، 2007

بسم اللہ

ارسال کردہ از Muhammad Shakir Aziz بوقت 1:12 PM ,

ساڈے ابا جی فرماؤندے ہندے نیں کُنڈ چک لیا تے نچن توں کی ڈرنا۔ میں اج سویرے سوچیا بندیا تو بلاگ لکھدا ایں تے اپنی ماں بولی وچ وی لکھ۔ چلو وکھرا بلاگ نئیں اردو بلاگ وچ ای ایک پاسے اینھوں جگہ دے لے۔ ایسے خیال دا عملی نمونہ تہاڈے سامنے پیش اے۔


میری پنجابی جدوں لکھن لگیاں تاں پتا لگیا اے اینیں چنگی وی نئیں۔ ایویں اردو وڑ وڑ جاندی اے۔ لفظ ای کوئی نئیں ہیگا کول لکھن واسطے۔ پنجابی اسیں صرف طنز تے ہاسے واسطے رکھی ہوئی اے۔ پنجابی وچ لکھن دا خیال مینوں پشتو تے سندھی بلاگ ویکھ کے آیا۔ سادے او پرا اپنی ماں بولی وچ لکھ سکدے نیں تے اساں کیوں نئیں۔


چلو اے تے اج دے بلیٹن دا ابتدائیہ سی۔ کجھ اج دا حال سن لو۔ ہونا کی سی۔ ایک پرچہ سی ساڈا ناں اودا ایڈوانسڈ انگلش گرامرز۔ سمجھ لو جداں بکرے لئی قصائی ہندا اے یا ڈکیتاں وچ سردار اوداں ای اے پرچا سارے پرچیاں دا پیو سی۔


اسیں سویرے سُقنے پئے ہوئے ساں رب جانے کی بننی اے۔ کئیاں تے سوچ لیا سی کہ اج صئی منجی ٹھک سیں۔ منجی ٹھکنا نئیں سمجھے تے اپنے کسے پنجابی بولن والے یار کو سمجھ لیا جے۔ اے خاص اصطلاح اے تے ترجمہ کردیاں اوکھا جیا کم اے۔


گل ہورہی سی پرچے دی، لو جی جدوں آیا تے سارے گلے شکوے پُل گئے۔ ایڈا اٰسان پرچہ۔ نہ پچھو۔ بس آپاں پندرہ منٹ پہلے کیتا اے تے فیر نالدیاں دے سر کھادے نیں۔ گانے گا کے تے فقرے کس کے۔


لیکن ساڈی ٹینشن مک گئی ہے۔


سناؤ سجنو کیسا لگا پنجابی بلیٹن؟ انشاءاللہ اے ہون باقیدہ چلیا کرے گا ایس بلاگ تے۔ امید اے دوسرے پنجابی یار وی پنجابی وچ لکھن گے۔ میری املاء کجھ غلط اے، اردو دے الفاظ استعمال کر جاناں واں لیکن ہولی ہولی عادت پے جائے گی۔ پہلی کوشش کیتی اے زندگی وچ پنجابی لکھن دی۔ الفاظ دی املاء بولن دے مطابق بناون دی کوشش کیتی اے۔ غلط ہووے تے درگزر کرنا.


اجازت دیو رب راکھا


 


 

Back Top

18 تبصرے:

  1. چلو چنگا ہویا اے کہ پشتو تے سندھی بلاگ کے ای خیال آ گیا اے، اونج کدے کدے میں‌وی پنجابی وچ اپنے بلاگ چ لخنا آں نالے شکر اے کہ منجھی نہیں‌ٹُھکی :D

  2. ہاہاہاہاہاہا
    ساڈی وی بچ گئی پاء جی ٹھکنوں
    نئیں‌ نے لگ پتے جانے سی۔

    محمد شاکر عزیز at 26 ستمبر، 2007 3:39 PM
  3. "پنجابی اسیں صرف طنز تے ہاسے واسطے رکھی ہوئی اے "

    ہیک واری میں ایہو جملہ محفل تے لکھیا سی تے جہانزیب نے میری چنگی بھلی ٹیوننگ کر دتی سی ۔ خصوصی طور تے مینوں جی میل تے پنج سات ای میلاں کیتیاں سین تے مینوں اپنے الفاظ واپس لون تے مجبور کیتا سی ۔ تعجب ہے کہ ہن اونہاں نے تینوں کچھ نہیں کہا ۔ مینوں ایہہ کوئی ملی بھگت لگدی ہے ۔

    بہر حال چنگی گل اے ۔ پنجابی وچ لکھو ۔ لیکن ہیک گل دسو ۔ جہانزیب نوں میں ویکھیا ہے کہ او گورمکھی سکرپٹ دے پچھے پئے ہوندے نیں ، تیرا کی خیال اے پنجابی نوں گورمکھی وچ لکھنا چائیدا اے یا نستعلیق وچ؟

  4. میں وی کئی واری سوچیا اے کہ پنجابی وچ لکھاں لیکن گل ایہہ ہے کہ انہوں پڑھے کون؟ دوجی گل ایہہ کہ میری پنجابی "جانگلی" ایے جیڑی خانیوال تے جھنگ دے علاقے وچ بولی جاندی اے ۔ لاہوریاں تے فیصل آبادیاں نال ساڈا کی مقابلہ :(

  5. گل تے ستھری کیتی اے اونج میویں اس گل نوں ماننا اے کہ کدی کدی پنجابی دا تڑکا لا لینا چاہیدا اے ، ایدا وکھرا ای سواد اے ۔

    شاکر اللہ دا شکر کر بھرا کہ منجی نئیوں ٹھکی نئیں تا تسی کسے پلنگ تے موجاں پے کر رہوے ہوندے۔

  6. قدیر لہجے دے فرق نال کوئی مسئلہ نئیں۔ یار پنجابی لکھاں‌ گے تے قائم رہنی ورنہ اے جاندی پئی اے۔ جیویں‌ ایدھے وچ آکے دوسریاں‌ زباناں‌ ملدیا نیں اے اُڈ جانیں‌ اے چڑی وانگ۔
    گورمکھی شاید زیادہ بہتر ہووے اس دیاں‌ آوازاں‌ واسطے۔ تینوں‌ کدی محسوس نئیں ہویا پنجابی دیاں‌ کجھ وازاں‌ اساں‌ اردو دے حروف تہجی نال نئیں‌ کڈ‌ سکدے۔ یا فیر اے لہجے دا فرق اے۔ جیویں‌ پنجابی وچ لام اردو وانگ نئیں ہلکے جئے چٹکے نال کڈی دا اے۔ کدی کڈ کے ویکھیں۔ اینھوں‌ اردو دے لام نال بندہ ہن کیویں‌ لکھے جدوں‌ کہناں‌ ہووے "نال"۔ یا فیر اے لاہوری فیصل آباد ہی لام نو چٹکا دے کے پڑدے نیں۔
    سرکار پلنگ چھڈ‌ اونھاں‌ساڈے پیروں‌ زمین کچھی پئی سی۔ پر رب دا کرم دیا گل بن گئی۔

    محمد شاکر عزیز at 26 ستمبر، 2007 9:31 PM
  7. نعمان نوں‌ تھیم وچ کوئی مسئلہ لگیا اے ۔اونھاں‌ سپیشل ای میل کرکے اے تبصرہ کیتا اے۔

    تہاڈی پنجابی پوسٹ پڑھ کر چنگا محسوس ہویا۔ اسی امید کردے نے کہ تسی
    پنجابی زبان وچ لکھن دا سلسلہ جاری رکھو گے۔

    پاء‌ جی اساں‌ انشاءاللہ تہاڈی پنجابی وی ٹھیک کردیاں‌ گے۔ مسئلہ اے وے کہ ساڈی پنجابی وی صحیح‌ پنجابی نئیں جدوں‌ اسیں پنڈاں‌ تی پنجابی سندے آں‌ تے پتا لگدا اے کہ ذخیرہ الفاظ ساڈے کول ہے ای نئیں۔

    محمد شاکر عزیز at 26 ستمبر، 2007 9:46 PM
  8. میں‌جہیڑی گل کیتی سی گورمکھی واسطے اودا مقصد اے سی کہ دواں‌پاسیاں‌ دے لوک انہوں‌ پڑح سکن ۔ نہیں‌تے شاہ مکھی اچ وی سارے اوہ تلفط ہے نے جہیڑ؁ پنجابی واسطے لازمی نے، پر پنجابی حروف تہجی اردو نالوں‌تھوڑ؁ زیادہ ہے نے ۔ اپنا آرگ ڈآٹ‌کام تے ویکھیا جا سکدا اے ۔

  9. گورمکھی دے حروف دے اونیں ای نیں جنھیں اردو دے نیں۔ یار پنجابی دے لہجے وی دے کئی نیں۔ اسیں پرا کئی دا اے جھنگ والی طرف بھرا کہندے نیں۔ ہن بندا کینوں لکھے۔
    نال دی مثال دتی سی اسیں لام نوں چٹکا دے دئی دا اے لیکن جھنگ ول ایداں نئیں ہندا۔

    محمد شاکر عزیز at 27 ستمبر، 2007 5:35 AM
  10. میرا ذاتی خیال اے کہ چونکہ ساڈے صوفی شاعراں نیں وی شاہ مکھی نوں ہی ذریعہ اظہار بنایا سانوں وی شاہ مکھی نوں فروغ دینا چائیدا اے۔

    محمد شاکر عزیز at 27 ستمبر، 2007 5:37 AM
  11. شاہ مکھی دا ربط دیو ذرا ۔

  12. http://apnaorg.com/ پر شامکھی اور گورمکھی دے سبق ہے نیں‌۔ نال اونھاں‌ حروف تہجی وی دیتے ہوئے نیں۔

    محمد شاکر عزیز at 28 ستمبر، 2007 12:25 AM
  13. مینوں کچھ سمجھ نئیں آرئی اے۔

  14. کس سلسلے وچ پاء‌ جی۔
    تسی پنجابی سمجھ لیندے او؟

    محمد شاکر عزیز at 28 ستمبر، 2007 12:48 PM
  15. بولن وچ کچھ سمجھ آندی اے پر لکھن والے سر توں گزر جانی اے۔ کوئی پلگ ان نئیں ترجمے واسطے؟ ;)

  16. ہاہاہاہاہا
    نئیں پاء جی ایس کم لئی ہلے کوئی چیز نئیں بنی

    محمد شاکر عزیز at 30 ستمبر، 2007 2:12 PM
  17. او پاجی سانون وی مزا آیا ۔ ہاہاہاہ ۔ پنجابی زبان میں لکھا کریں بڑی پیاری زبان ہے ، آپ لوگوں کے کمنٹس سے میں بہت محظوط ہوا ۔ پلیز اسے جاری رکھیں ۔ اور ساجد پاجی توسی کیہ کہی دے او تسوسی پنجابی سمجھ نہیں آندی ، سانوں تے 90 پرسنٹ سمجھ آگئی اے ۔ رب رکھا

  18. بڑی مہربانی جناب دی۔

    محمد شاکر عزیز at 15 دسمبر، 2007 9:21 AM

ایک تبصرہ شائع کریں

براہ کرم تبصرہ اردو میں لکھیں۔
ناشائستہ، ذاتیات کو نشانہ بنانیوالے اور اخلاق سے گرے ہوئے تبصرے حذف کر دئیے جائیں گے۔