ہفتہ، 2 جولائی، 2016

اردو محفل فورم کی گیارہویں سالگرہ پر

ارسال کردہ از Muhammad Shakir Aziz بوقت 3:28 PM ,
عرض کیا ہے کہ
وہ بھی کیا دن تھے
جب ہم جِن تھے
اب ہم چھوٹے موٹے ہی سہی
دیو ہیں
یعنی
جِنوں کے پیو ہیں
قصہ 2005 کے اواخر 2006 کے اوائل کسی وقت کا ہے۔ جب ہم اتنی ہی صحت، کچھ کم وسیع متھا شریف اور متھا جمع بُوتھا شریف پر ذرا کم کم جُھریوں کے حامل تھے۔ بی کام تقریباً کر لیا تھا۔ اور اس کے بعد کیا کرنا ہے، کچھ نہیں پتہ تھا۔ عرصہ کئی برس سے کمپیوٹر پر اردو لکھنے کی کوششیں فرما رہے تھے۔ ان دنوں یاہو اور ایم ایس این نیٹ ورک کی چَیٹ سروس بڑی مقبول تھی۔ اور ہم ایک بیرون ملک مقیم پاکستانی کے تیار کردہ سافٹویئر اردو لنک میسنجر کو استعمال کر کے اردو میں چَیٹنے کی کوشش فرمایا کرتے تھے۔ بس انہیں دنوں کا قصہ ہے کہ ہمیں اعجاز عبید صاحب کے یاہو اردو کمپیوٹنگ گروپ کا پتہ چلا۔ اور پھر ایک نئے اردو فورم "اردو محفل" کی بھنک پڑی۔ اور ہم اس پر جا پدھارے۔

میرا خیال یہ فورم قائم ہوئے کوئی چھ ماہ کا عرصہ ہو چلا تھا۔ فورم کے ممبران کی بڑی تعداد بیرونِ ملک مقیم پاکستانیوں کی تھی۔ ہندوستانی احباب بھی چند ایک موجود تھے۔ ان میں سے اکثر لوگ اردو بلاگ بھی لکھتے تھے یا بعد میں لکھنے لگے۔ تو یہ ان دنوں کا قصہ ہے جب ہم ذرا جوان شوان تھے، اور اردو کے لیے بہت کچھ کرنے کے جذبے سے سرشار تھے۔ آج سے گیارہ برس قبل یہ فورم ایک عملی ثبوت تھا کہ کمپیوٹر پر اردو لکھی جا سکتی ہے۔ ہم اتنے خوش تھے کہ کئی ایک پراجیکٹ شروع کرنے کی ٹھانی۔ ایک لائبریری جس میں اردو کی کلاسک کتابیں ٹائپ کر کے رکھی جائیں۔ تاکہ آئندہ نسلوں کے لیے اردو متون کمپیوٹر پر دستیاب ہوں۔ اس کے لیے ہم نے ایک عدد کتاب ہاتھ سے ٹائپ فرمائی اور پھر ایسے بھاگے کہ پیچھے مُڑ کر نہیں دیکھا۔ شاید ایک آدھ اور کسی کام میں بھی حصہ لیا ایک اردو فہرستِ الفاظ کی تیاری میں کچھ ہاتھ بٹایا (جسے بعد میں اوپن آفس میں اردو املاء یعنی سپیل چیکنگ کے لیے استعمال کیا گیا)، لائبریری پراجیکٹ کے لیے ایک آدھ سافٹویئر (جسے بعد میں کبھی اپڈیٹ نہیں کیا) جس کا کام امیج کو دیکھ کر ٹائپنگ میں مدد دینا تھا، اور پھر خاموشی کے طویل وقفوں کے بعد کبھی کبھی کفن پھاڑ پوسٹنگ (ادھر اُدھر سے اکٹھی کر کے کچھ اردو انگریزی اور انگریزی اردو لغات ڈیٹابیسز کی تیاری وغیرہ)۔ عرصہ ساڑھے دس برس کا یہی خلاصہ ہے۔

ان گیارہ برسوں میں اس فورم نے اردو کمپیوٹنگ کے حوالے سے کئی ایک کارہائے نمایاں سرانجام دئیے۔ اس کے اراکین نے ویب پر نستعلیق کی فراہمی سے لے کر کرننگ، اور کئی ایسے سافٹویئر بنانے کا کام سرانجام دیا جو کمیونٹی ڈویلپمنٹ ماڈل کے تحت اردو کمپیوٹنگ کے فروغ کا باعث بنے۔ یہ فورم انٹرنیٹ پر اردو کے عروج کے معماروں میں سے ہے۔ اس کا حصہ رہنا میرے لیے باعثِ فخر رہا ہے اور رہے گا۔ آج مجھے وہ رونق نظر نہیں آتی جو پانچ سات برس قبل اس کا خاصا تھی، بہت سے آشنا چہرے کسی اور منزل کے راہی ہو چکے ہیں، انٹرنیٹ پر سوشل میڈیا سائٹس کی مقبولیت نے بلیٹن بورڈ فورمز کے بل پر اپنی یوزر بیس میں اضافہ کیا ہے، لیکن پھر بھی ایسے فورمز کی اپنی ایک اہمیت ہے۔ انٹرنیٹ کے لامحدود خلاء میں یہ چھوٹی چھوٹی انسانی بستیاں اپنائیت کا احساس دلاتی ہیں۔ اس تیز رفتاری سے بدلتی دنیا میں یہ بستیاں ہمارے ماضی (سمجھ لیں کہ انٹرنیٹ کے دس برس شاید عام زندگی کے پچاس یا سو برس ہیں) کی یاد دلاتی ہیں کہ ہم نے ابتدا کہاں سے کی تھی۔ جب تک انٹرنیٹ ہے ہماری کوشش رہے گی کہ ایسی بستیاں آباد رہیں۔ ہم کہیں بھی چلے جائیں، واپس لوٹ کر یہاں ضرور آتے ہیں۔ اس بستی سے کچھ ایسی محبت ہے کہ یہاں کسی سے کلام نہ بھی کریں، چپ چاپ کسی گلی کوچے میں بیٹھے رہنا، آتے جاتے رہنا، اور پنجابی والی جھاتیاں مارتے رہنا اچھا لگتا ہے۔ اللہ اس فورم کو آباد رکھے۔ اس بستی کو سلامت رکھے کہ اس کے در و دیوار پر ہماری آپ کی تاریخ رقم ہو رہی ہے۔

Back Top

1 تبصرے:

  1. اچھا اظہار خیال

    آپ نے اپنی تحریر کو بلاگ کے سپرد کیئے ہوئے ٢٤ گھنٹہ سے زیادہ ہوچکے. تحریر کچھ زیادہ Dry بھی نہیں ہے. یا پھر روزوِں نے نڈھال کر رکھا ہے سبھی کو. پڑھ تو لیا ہوگا کم و بیش سبھی نے کچھ زیادہ متاثر نہ ہوئے ہوں. کوئ اور حضرت اس سلسلے کو آگے بڑھائیں اور مزید روشنی ڈالیں.


    ذکریٰ خان

ایک تبصرہ شائع کریں

براہ کرم تبصرہ اردو میں لکھیں۔
ناشائستہ، ذاتیات کو نشانہ بنانیوالے اور اخلاق سے گرے ہوئے تبصرے حذف کر دئیے جائیں گے۔